انسان للشاعر //محمد عسل
- ولا كاتب ولا شاعر ...
- ولا وسط الوسَط فنان..
- أنا بين البشر كلمه...
- أنا وسط الحروف إنسان...
- أنا قالع جذور الكُره من قلبي...
- ولابس جلد متنقرش بلون أحزان..
- يجوز الجلد متبقَّع بُقع أفراح..
- لكن باهت ومترقَّع رُقع حرمان..
- وجلدي نزلت بيه مخلوق..
- ومتفصَّل يعيش تعبان..
- ومتكعبل معاه الجسم تحت وفوق...
- ومتألم معاه الدمع ف الأجفان..
- وكل ملامحي ف مرايتي خانقها الطوق..
- وحتي عيوني محرومه من الألوان..
- وبتمني كتير أقدر أكون بجناح..
- وأطير فوق الجراح واهرب من الأحزان..
- وبتمني سجين الضلع يوم يرتاح...
- ويجري الفرح يتلخبط مع الشريان...
- ترُج الضحكه كل الجسم من جوه...
- ف تظهر زي وردة حب ف البستان..
- وبتمني وبتمني وبتمني...
- وهتمني عشان إنسان..
- ولا كاتب ولا راسم ولا شاعر...
- ولا وسط الوسَط فنان...
- أنا بين البشر كلمه..
- أنا وسط الحروف إنسان.
ليست هناك تعليقات:
إرسال تعليق