فرح ممنوع للشاعر // محمد عسل
- منيش دارس أُصول الوزن والقافيه..
- بُحور الشِعر مش عايم أنا فيها..
- سألت وقالوا (سِتاشر)ومش كافيه..
- وانا ع الشط مش قادر أعديها..
- أنا لابس (لجلدي) ولوني بالعافيه..
- حروفي بتلمس الأوراق تدفيها..
- ومش بكتبها لجل إني أكون مشهور..
- ومش فارق حروفي تضيع أراضيها..
- أنا عيني بقالها سنين ما شافت نور ..
- ف يبقي أكيد طلوع الشمس يأذيها..
- (ومتكَتِف) أنا قلبي ف وسط ضُلوع...
- أكيد لو عاش لها (محبوس) هايرضِيها..
- طريقي لو عليه يافطِت (فرح ممنوع) ..
- هاحُط (حزامي) ع الأحلام أغطيها...
- وزي كتير مابين الناس...
- بكون موجوع..
- وبخفي دموعي جوه العين أخبيها..
- ووسط الكون أنا ساكت ...
- ومش مسموع..
- لكن عيني بتنطق حُزن يحكيها...
- وكل كلامي بيكون بس ع الأوراق..
- حروف يعني..
- مسير الدنيا تِمحيها..
- ولا عُمري حسبت ف يوم راح أكتب إيه..
- مُجرد فكره تهمس لي..
- أناديها..
- و(تترَج)المشاعر جوه وجداني..
- ف( تِتكَب) الحروف تنزل تغنيها.
ليست هناك تعليقات:
إرسال تعليق