* بيكى داويت اللى كان * بقلم اشرف احمد

• عاشق عنيكى أنا .. عشق الهوا والنور .. كلمة بحبكِ أنا .. بقولها كما المسحور .. ما انتى زمان الهنا ، بيكى الوجود بيدور .. فى نغم من الألحان * حبيبتى خلينى بين أحضانك .. امحيلى زمان الضنى ، واروينى بحنانك .. عطشان لضيَـك أنا ، عطشان أنا عطشان * فى حبكِ انتى حبيبتى ، حسيت بمعنى وجودى ..وبلمسة اِيديكى اِنتى ، ملكت ملكوت هنايا وسعودى .. هواكى هو ميلادى ، يا أجمل معانى الأسامى .. يكفينى اِنى بيكى .. صالحت تانى الزمان * بين نجوم الليل حبيبتى ، ناديتك بأشواقى .. لمست طيفكِ بحسى .. سكنت نبضك فى قلبى .. فى وصالى وفراقى .. ياللى عيونى ضياكى .. انتى الزمان والمكان * من شوقى ليكى حبيبتى ، رسمتك على خد النجوم .. حضنت طيفكِ فى قلبى ، دَوبلى كل الهموم .. ياعشق نبضه فى دمى ، انتى حروفى وصمتى .. وانتى اِحساس الأمان * لما حبيتك حبيبتى بدلتى حرمانى .. ومن نظرة عينيكى انتى ، ملكت عرش الأمانى .. فؤادى بيردد نداكى .. فؤادى اللى عمره ما خان * صاحبت الليالى حبيبتى ، ودوبنى السهر .. أناجى طيفك ياعمرى ، فى ضى القمر .. يانجمة هوانا قولى لحبيبتى : حبيبك على العهد باقى .. طول لحظات سنينه ، أنفاسه هى نداكى .. نبضه من حروفك حبيبتى ، ياترى دى حروف هى ؟ ، ولا دى ألحان ؟ * شايفك حبيبتى بعيون قلبى .. اللى دايب فيكى دوب .. بسمة شفايفكِ شروقى ، وبعدكِ عنى الغروب .. دمى فداكى حبيبتى ..بيروى دايما هوانا .. هوانا اللى بيضمنا .. واللى بينا حبيبتى أصبح للوفا عنوان * بقول بحبك حبيبتى .. لكل حبة مطر .. زرعت شوقى وآهاتى ، فى نبض أوراق الشجر .. حاسس بلمسك حبيبتى ، حتى من غير لقا .. بغير عليكى ياقلبى ، حتى من غيرتى أنا .. وادارى سرك ياقلبى حتى عن سرِى .. ملاك انتى حبيبتى : مين اللى قال اِنسان ؟ * منايا حبيبتى أكون : ليكى فى الهوى نسمه .. تهديكى انتى الزهور ، والورده والبسمه .. وتعدى ليكى بحور .. تسقيكى كاسات من نور .. سر الوجود فيكى .. وأحلى ما فيكى ان اِنتى ، فجر أيامى .. وسهر لياليا .. وانتى طبيب الروح ، اللى بكلمة بحبك : بيداوى كل اللى كان