إنسان سوي ،،، بقلم الشاعر حسين الديب ،،،

لا أنا فهلوي
ولا حابب أبقى فهلوي ،،
...

ولا عاوز أعيشها بالدراع
والناس يقولو دا قوي ،،
ولا عاوز أكون إنسان ضعيف
و راسي للناس تنطوي ،،
------
و المشكلة
إن الحياة متبدلة ،،
وكل ما تيجي تنصلح
تلقى اﻷمور متكعبلة ،،
وكل ما أقول هانت خلاص
أقع في مليون مشكلة ،،
-------
وآجي أنكسر في وقت ضعفي
ألاقي نفسي تنتفض فين عزتك ،،
إشهر سلاحك للبشر
وريهم عز قوتك ،،
إياك تنكسر أو تنهزم
لا الناس في لحظة تموتك ،،
إياك تحس إنك ضعيف
لا الضعف يهلك صحتك ،،
---------
وأرجع و أقول لنفسي كلمة
أنا مش قوي ولا فهلوي
ولا عمر راسي هتنطوي ،،
ولا عمري يوم هقبل أكون
غير إني أبقى
إنسان سوي ،،