- أوسع ميدان فى الدنيا.. هو ميدانك
يا مصر.. ياللى كتير قوى خلانك
...خليكى ثوره.. طاهره.. م اللى يخونك
إبنك حلف.. يمسح دموع أحزانك
يا مصر شدى الحيل.. هانصبح أكتر
مليون صلاح الدين.. ومليون عنتر
رافعين راياتك.. جنب كل بناتك
حالفين بعهد الله.. يعلّوا ف بيتك
صاينك إلهك.. واللى شانئك.. أبتر
ياللى انتى ثابته بينا جوه مكانك
أوسع ميدان فى الدنيا هو ميدانك
وحياة عنيكى يا مصر.. إحنا تعبنا
والشيله كانت مُره.. دايسه قلوبنا
بس الولاد الطاهره دقوا بيبانك
داسوا اللى خانك.. واللى ناوى يخونك
أخدوا إيدينا.. ورجعولنا شبابنا
الله عليكى.. وانتى راكبه.. حصانك
أوسع ميدان يا مصر.. هو ميدانك
جريده/شعريه,ثقافيه,أدبيه,فنيه,متنوعه
الأحد، 10 يوليو 2016
أوسع ميدان..الشاعر ابراهيم رضوان
الاشتراك في:
تعليقات الرسالة (Atom)
ليست هناك تعليقات:
إرسال تعليق