مع اللي ماتوا..ميته..الشاعر ...ابراهيم رضوان

يعني انتي سايبه الناس تسافر..
لاجل تغرق جوه موج الفقر..
و صراخ الجواعه المسفوحين
يعني انتي واقفه علي الشطوط..
تتفرجي ..ع الميتين
و تهرجي.. جوه الأنين
و بتعرجي.. ع السكه..ماسكه مسبحه
إزاي تغني جوه نار المدبحه
يا اللي قتلتي في روحنا دايما..
كل حاجه مفرحه
صبحت شطوطك للي رجعوا..مشرحه
و الموج صبح في الضلمه..فجأه..،،فورمالين،،
يا ام الإيدين متكتفه..يا ام الإيدين..
متكبلين بالفقر ..و الجوع الغبي
هو انتي ليه يا غريبه..
مش عايزه تصلي علي النبي..
و تطبطبي علي ضهرنا
هو انتي أهلك ليه بيرضوا..
بكل نائب لولبي
يا ماسكه لسه الميكرفون..و بتخطبي
و بتشربي..دم الضحايا..
بعد ما غرقوا في موج اللكلكه
ما تآمني بالله العظيم..يا مشركه
و تعودي للإيد الحديد.. علشان نعيش
يصبح جناحنا بحاجه.. بيسموها ريش
يا ام الجناح منفوش بداء الكدب..
في مواجهة فقير
يا ام الغفير ممصوص..
و ماسك بندقيه مزوره
راجعه ورا..راجعه ورا ..راجعه ورا
و مصفيانا ..عود قصب
النظره..مات فيها العصب
و اليأس..ع السكه اتنصب..
للي ما زالوا بيشحتوا
نامت جثث..جوه المحيط،..و اتفتتوا
و ما زلنا لسه علي الشطوط..
مستنظرين باقي الجثث
نايمين و لسه الخوف مالينا م ،،العسس،،
تحت السرير..نايمه العرس
فما تمسكيش لينا جرس
علشان يبيعنا الفقر.. في مليون مزاد
ما تغرقيش تاني الولاد
عودي يا أمي و شقشقي..
ع الكل..بنجوم الميلاد
أنا جيت إليكي..معايا ليكي..
رغيف حروف
و..وقفت فيه جوايا خوف
بس انتي يا جوع الصفوف..جوه البلاد
مش عايزه تيجي في الميعاد..و بترضخي..
لحاجات عقيمه ..و لينا دايما تشرخي
أوقات تكوني ،،جيفارا،،بالتوب الشريف
و ساعات كتير..تستشيخي
و بتمسخي..كل التاريخ
قسيس و شيخ..
بيزوروكي بدون ضمير
و بيمسخوكي كتير..
في ميت مليون مظاهره مزيفه
هو انتي ليه فاقده الدفا..فاقده العطا
كوني الحياه..و اوعي في يوم..
ترضي تعودي مع اللي ماتوا..ميته