مش م العبيد ..شعر عامية...الهام شرف

شاهد شهيد
مش م العبيد
كلمة وكانت معجزة
وقروها على صفحة وليد
إمتى هكون بالشكل ده
إمتى الشهادة تنكتب
دمعة جيرانه بنتسكب
أمه تقول عرسه ابتدى
وما فيش بكى وما فيش زعل
لولا الملامة لسمعك
كل العجب
زغرودة يا أهل البلد
ابنى شهيد وبيتولد
من النهاردة بيتوجد
قلب الصبايا بيتوعد
قولوا معايا اليوم ده عيد
وكفكفت دمع الفراق
واتقبلت وقبلت خد الصبى جوه الزقاق
ودعت يا رب العالمين
صبري يبارك خطوته
باب جنته
مفتوح وشفته من سنين
قاللي يا أمي ما تزعليش
ابني يعيش
أصل الشهادة أكيد شرف
بالله عليك ما تبكيش
ابنك وتد
جوه البلد
ابنك يناضل عالحدود
ما لهوش حدود
غير إنه من نفس البلد
ابنك شهادة عاللي راح
واللي جاي سميه سند