لو بإيدي ***********بقلم / إبراهيم فهمي المحامي

لو صحيح مكتوب أحب
كنت حبيتك كمان
كنت أبدأ صفحة تانيه
فيها صورتك من زمان
كنت نقشت حروف لإسمك
جوه بحروف الحنان
جوه قلبي جوه نبضي
جوه دمي والشريان
كنت حلمت وعشت حلمي
في البحور وف الوديان
كنت كتبت حروف قصيدة
تبقي درس للولهان
كنت مسكت النجم يضوي
لاجل يفرشلك أمان
كنت منعت الخوف يجيلك
أو يطولك أو يبان
كنت جعلت كفوف إيديا
تشربي منها الحنان
كنت بنيت لك قصر عالي
وأبقي حارس بصولجان
كنت منحتك حب عمري
وبرضو قلبي يقول كمان
لو بإيدي أعيش أحبك
عمري ولآخر الزمان
بس عجزي إني ف خريفي
والآوان مبقاش أوان
والحياة مش ملك قلبي
والنصيب مربوط ب كان
لو بإيدي يا حب عمري
قد أطلقت العنان
للأماني والثواني
والدقايق والزمان
كنت أحوش اللحظة تمشي
وانت جنبي ف المكان
لو بإيدي يا نبض قلبي
كنت حبيتك كمان
بس حبي غاص في بحرك
بحر مفيهوش الشطآن .....