قصيدة : ( عنتر )بقلمى / أسامة عياد

 أفندم حضرتك تؤمر
وتتحنطر وتتمخطر

يا وش السعد من يومك
وراك نهتف وبنسفر
وطوب الأرض بيهابك
مهيب الركن يا عنتر
نرفرف وقت م نشوفك
معاك نضحك وبنكركر
ننام نصحى على صوتك
غناك يسطل وبيسكر
ونفضل برده نسمعلك
ونفس اللحن يتكرر
نطبلك نسقفلك
ونرقصلك على المزهر
يمتعنا أوى خطابك
كلامك عقد من مرمر
ويهبل لونه ع العمة
جميل ذوقك م يتقدر
مرتب كل أفكارك
لا تتفزلك ولا تكتر
مطيرنا بأحلامك
سيادتك فاكر المنظر
مغرقنا كمان ظرفك
ودمك أحلى م السكر
ملامحك ناطقة من صورتك
عليك سحنة ما تتغير
وقلبك أصفى م البفته
وعقلك فلة ومنور
سلام سلم على وشك
ما بيقدمش بيأخر