مش للبيع ... قصيدة الشاعر / أحمد صبري

مش للبيع
احمد صبري
-
مش للبيع 
ولا عمري هاكون
للبيع
ولا هامشي في اي قطيع
اسير الكلمة والطاعة
راميها سفاهة ونطاعة
لا انا اهبل ولا بالساعة
هاْجر روحي
للتلميع
مش للبيع
ولا للإيجار
ولا عمري هاعيشها
حمار
انفذ اللي يتقال لي
اخون اصحابي او اهلي
انا قراراتي من عقلي
وتشهد صفحة الاخبار
-
مفيش واحدة تمشيني
ولا واحد يخليني
افوض امري غير لله
اطاطي راسي او عيني
كلامي حر من راسي
سلاحي قلمي و إحساسي
واللي يخوني انا بنساه
كرامتي طبعي واساسي
-
مش للبيع والتطبيل
لا سكتي ولا لعبتي
وعارف غيري الف بديل
والدنيا دي مش دنيتي
لكن طبعي وانا راضي
اعرض نفسي للتقطيع
ومهما اتعب على الفاضي
عند الله ومش بيضيع
-
مش للبيع
ولا عمري هاكون للبيع
مش للبيع
تحبوا انشرها ولا 
اذيع