فضفضة قلب يئن .... كلمات بقلم الدكتورة/ هاله نور

عن الكلمة اللي مش عارف تقولها.. والفكرة اللي مش عارف توصلها.. والاحساس الجارف اللي مخبيه جوا قلبك... وغصب عنك بيظهر في كل كلمة بتنطقها.. 
عن الحياة لما تبقى صعبة عليك ومش عارف تشاركها احسن تتقل على غيرك.. عن شعورك بأن مهما شرحت مش بتتفهم صح عشان تصرفاتك عكس احساسك..
عن اللحظات اللي بتوحشك... والحنين اللي بيجرفك ويخليك تطلع فوق السحاب...وينزلك سابع أرض.. 
عن كل لحظة ألم عشتها عشان حبيت.. عن كل فرحة محستهاش عشان اتنسيت...
عن اللغبطة واعاصير الفكر اللي بتعصف بعقلك كل ما بتحاول تعيشها صح... عن وجع قلبك وانت بتحاول تتزن في عز ما انت عايشها غلط.. 
عن الشدة اللي بتعيشها ومش بتبين... عن كل تصرف غلط بتحلم ترجع فيه ولا ينفع... عن كل غلطة رهيبة وقعت فيها ومفزوع من فكرة ان بشر تلقاها... 
عن الخوف من الوحدة... والضغط من الاختلاط بالبشر... عن تعبك في انك تشرح انك بس محتاجهم يفهموك صح...
عني وعنك.. وحكاية مش بتكمل صح.. قصة كان ليها بداية ونهايتها بتتكتب بسكينة بتغرز كل يوم اكتر في قلبك.. لو حاولت تشيلها وجع... ألم ... 
#تايهه_فى_سكة_مسدوده
#فى_سكون_الليل_يضج_القلب_بالكلمات