قصيدة ... عدّيت علي روحي .. للشاعر المبدع / فهمي علي

عديت على روحى 
ف الشارع التانى 
اللى مهوش جنبى 
فلقيتها بتعانى 
حاولت اخرجها 
من صمتها عاندت
كلمتها بشويش 
ف الاخر اتسندت 
فسألتها مالك 
و اشمعنى مخنوقة 
بتخاصمى ليه الدنيا 
و بترفضى الروقة 
و مفارقة ليه عينى 
و بتقسى على قلبى 
و حالفة ما تجينى 
و لا تقعدى جنبى
قالت لى مش وقته 
تسأل عن التفاهات 
و تخوض ف تفصيلة 
انسى بقى اللى فات 
خلينا ف الجارى 
حوالينا و بيجرح
الضحكة موجوعة 
و الاهة مسموعة 
و نفوسنا مخدوعة 
و اللى جهل يشرح
اعمى البصر سايق 
و الحر متضايق 
و الكاتعة تتعايق 
و الكلب له مطرح
انسانى و امشى بعيد 
و بلاش تقول و تعيد
ما خلاص ما عادش جديد 
و الهم بقى يطرح
بص بعنيك هتشوف 
ضى القمر مكسوف 
عايشين ف اقسى ظروف 
خنقانا فبنسرح
اسمر يا شجر البوح 
حتى الوليد مجروح 
لما الحمام بينوح 
كاره اوى يمرح
لميت انا نفسى 
قلت لها ليه تقسى 
ما تجربى تنسى 
قومى بنا نبرح 
#فهمى_على