اصدقائى الاحباء
ونعود لحكايات (حمارة يويو)
مع عم علوانى وهسكه والواد صاصه الغلباوى..
امبارح كان فيه ماتش ريال مدريد وبرشلونه وده ماتش الناس كلها بتستناه من السنه للسنه فقلت لنفسي ياد لِم إصحابك رهوانه وصاصه وهسكه ونروح نتفرج على الماتش عند عم علوانى ده كان لعّيب كبير وحرّيف فى زمنه وكمان عنده شاشه كبيره..
واحنا بقى روحنا قبل الماتش يجيى بساعه كده ولسه الاستوديو التحليلى بيحلل خطر على بالى فكره جميله ...فقلت لعم علوانى ماتحكلنا شويه عنك وعن لعيبة عصرك الجميل ...قال لى انا بقى هاحكيلكم عن نادى كبير جماهيره اكبر من جماهير الاهلى والزمالك والاسماعيلى والمحله والاتحاد ..قولتله يعنى فاضل مين يعنى دمياط والمصرى ؟؟؟قال لى بس اسكت انت خلينى اكمّل الحكايه ولا اسكت ؟..قولتله كمّل ياعم علوانى وده نادى ايه قال لى ياابنى اسكت مش مهم اسم النادى..المهم اسم اللّعيب القزعه اسمه ايه ياعم علوانى قال لى (تاح رع ) كنا مسمّينه كده علشان هوه كان لعيب نص كم وراح لامم شوية رديف من انديه درجه عاشره او من جنب سور الانديه وكان عامل نفسه مدير فنى ومدير الكره وهوه برضه الدكتور وماكنش ناقص الا يخطّط الملعب وكان كل مايلعبوا ماتش يتغلبوا علشان هوه اصلا مالوش فيها وكان لمّا يبدّل لاعب بلاعب كان اللى بينزل افشل وافشل من اللى خرج وكل خططه فاشله سواء لعب بخطه دفاعيه او هجوميه ولو اى لاعب اعترض على اسلوبه او خِطّته اللى هيه نهجم ونرجع المشهوره ..يُطرد اللاعب من الملعب ويشطبه ومش عامل حساب لجماهير النادى اللى تعدّت الملايين شوف انت بقى عدد جماهير تخطّى جماهير الاهلى والزمالك وباقى الانديه الجماهيريه . ولو حد قال له طب ماتخرج انت ولاعب ينزل مكانك يمكن ربنا ينصفنا ونكسب ماتش ..يقول له اسكت انا بس اللى اتكلم وانا بس اللى ابدّل انما انا اخرج لااااااا ده انا الوحيد اللى اقول وانتم تسمعوا ...طب ياكابتن والجماهير دى كلها اللى مش لاقيه لعبه حلوه .والجماهيردى كلها اللى مش لاقيه لمسه حلوه..والجماهير دى اللى بتموت من الحزن والهم والغم على فريقها ...وهنا سكت عم علوانى عن الكلام والتفت شمال ويمين وشرق وغرب ورفع ايده للسماء وقال يارب فرّح جماهير فريقنا بقى ياااااارب اوعدنا برئيس نادى ومدير فنى وجهاز معاون وجهاز طبى بقدرتك اللى فاقت كل الحدود يااااااارب فرّح جماهيرنا بمدّد من عندك علشان خاطر كل الجماهير الغلبانه دى...وراح حكم المباراه مصفّر وبدأت المباراه وجون واتنين ولعبه حلوه هنا لمسه حلوه هناك ..ومبرووووووووك كاس السوبر لريال مدريد
بقلم / خالد صحصاح أبوصالح
( ملحوظة التلميح والتشبيه ليس مقصودا ولكنه من قبيل المعالجه للطرح فقط )
أزال أحد مشرفي المدونة هذا التعليق.
ردحذف