قصيدة:إنت مين للشاعر/ محمد حجاج

إنت مين يا صبيه
ياللى دمك بينزف بين إدية 
انت مين يا مليحة
ياللى روحك رايحة جاية
قالتلى انا اللى ولادى غدروا بية
وبالخناجر والسيوف طعنونى
وبالملتوف حرقونى
أنااللى ولادى ظلمونى
وباسم الدين هدونى
سحلونى وعرونى
قتلوا ولادى وقتلونى
حرقوا أرضى وحرقونى
أنا اللى ولادى ما رحمونى
أنا يابنى اللى حملتك 
وفى حشاى حميتك 
قبل ما تشوف النور ربيتك
أنا اللى صدرى حن لك
ومن حنانة غذيتك
أنا اللى دمك 
من دمى اللى وهبتولك 
أنا اللى حبيتك وراعيتك
أنا اللى اسمى رددة الكون
أنا اللى نورى نور للمظلوم
أنااللى ايدى بالسلام ممدودة
أنا اللى ميمى مية للظمآن
أنااللى صادى صدر كلة امان
واسأل عنى القرآن
أنا اللى رائى رحمه للإنسان
أنا مصر ……….مصر
اللى ولادها بينهشوا فيها
غسلوها وكفنوها
والروح لسة فيها
وأصروا قبل ما تموت يدفنوها
أنا اللى العدا ضحكوا على ولادى
وقسوا قلوبهم على
أنا اللى نيلى فى الأرض كوثر
ميته شهد مسكر
يروى العطشان
أنا أرضى خير طول الزمان
أنا اللى رملى يشفى العيان
أنا اللى بحرى مليان حيتان
تنهش لحم الظالم الجبان
أنا اللى اتحملت الطعنات
وفى القلب كتمت الآهات
أنا مصر اللى هتعيش أبيه
وتظل رمز للحضاره والحريه