الموت والخوف ... كلمات الشاعر / السيد ابوطاحون

الموت والخوف *** بقلم السيدابوطاحون
*********
ان شاء الله 
هتخف هنا
وتخف هناك
يعني انت خلاص
بتسلم نمرك 
في الشباك
وتسيبنا هنا
او حتي هناك
عايشين وبنلضم
في الاحلام
نهرب ع النوم
ونداري دموع الخيبه
و (ا)لاستسلام
ونحارب تعابين الاوهام
الساكنه ف جدور الايام
ورا او قدام
وأنت بتسلم وبتهرب
إياك إياك
انا عارفك راجل
بتعافر
وفسايل 
لسه بتستناك
تزرعها و ترسمها
علي هواك
ما تخافش يا صاحبي
أرجوك تستني 
يا إما ...انا جي معاك 
انا نفسي 
ما تموت مظلوم
جهز نفسك
فرسك
عسلك
عملك
املك
الموت رحله
رحلة راحه ونوم
وتقوم
وتلاقي جمال
ولا ف الاحلام
وحلاوة جبال
وجناين ولا كات
ع البال
ولا اي خيال
ماتخافش من
الموت السافر
في سريرك
او كنت مسافر
كلها ثانيه
وتلاقي نفسك 
في الروضه
وتطير
ولا أجدع عصافير 
شبابيكك فاتحه
علي الجنه
اتهنى
ومافيش محازير
لا كرب عليك
بعد اليوم
*********
#الموت_والخوف 
#الاخنوم
#السيدابوطاحون