إغضب
من ديوان / سيبنى أحلم
للشاعر/ مصطفى فريد
إغضب ٠٠
قد ماتقدر تغضب ٠
إغضب
أنا مليت إحساسى بضعفك
ثور ٠٠
إتعصب ٠٠
يمكن تلقى فى إحساس
غضبك
نشوة تكمل بيها فى طبعك
رمز رجولتك
عايزاك تعرف
أنا مش هامش جوه حياتك
أنا مش تابعة للمتلكاتك
انا إنسانه ٠٠
ليا مشاعر ٠٠
ليا وجود ٠٠
ليا حدود مرسومه بإيدى
أوعى تفكر
لما تثور قدامى راح اضعف
أو استسلم
إغضب ٠٠
إبعد ٠٠
إهدم أى مشاعر حلوه
بنيتها معاك
إنسى دموعك يوم ما سامحتك
على خطاياك
جرب مره مشاعرك تغضب
لحد ما تصبح جواك
نار ٠٠
تحرق كل مشاعرى
وتلغى وجودك فيا
وزى ما حبك علم قلبى
إزاى يحتار
أنا علمت عواطف قلبى
إزاى تختار
أهم قرار
لو هتكون جواك الجنه
أهون ليا أعيش فى النار
ليست هناك تعليقات:
إرسال تعليق