وقفة مع النفس ... بقلم الأستاذ / حسن سعيد حسن

وقفه مع النفس
========== حسن سعيد حسن

باقي من الزمن ايام معدوده. ويبداء العام الدراسي الجديد ...اللهم اجعله عام حب وخير ونجاح لاولادنا جميعا. .بس اهمس في اذن كل ام واب . بتلك العبارات. . وارجو ان نعيها جيدا. ....
 نسايم الدراسة هلت وهتشوفوا بعنيكو الأمهات

اللي عمرهم ما صَحوا ولادهم للصلاة.. بيصحوهم من النجمة عشان المدرسة.

اللي عمرهم ما عَودوا ولادهم يصلوا.. واقفين من النجمة يساعدوهم يجهزوا ادواتهم وكتبهم.

اللي بتقول لولادها مرة كل كاااام شهر صلي ومتكررهاش بحجة ان ريقها نشف ياااعينى.. هتسمع صريخها من آخر الشارع عشان ميفوتش معاد المدرسة او الدرس الخصوصي أو تسميع الكلمات.

اللي عمرها ما جهزت جلابية ومصلية عشان تشجع ابنها ينزل يوم الجمعة ويتعود صلاة الجماعة.. هتشوفها بتلف زى النحلة على اليونيفورم واللبس الرياضى و بتخبط بالمشوار عشان تجيب أحسن حاجة.

اللي بتكسل تتابع ابنها فى خمس صلوات بس.. متابعة ومدونة كل مواعيد دروسه وأرقام المدرسين والسناتر وجدول الحصص وعدد كتبه وكشاكيله وأرقام أصحابه وأولياء أمورهم والرحلات والأنشطة.

اللي عمرها ما زعلت ولاخدت موقف ان ولادها مبيصلوش .. بتعمل مناحة لما درجاتهم تقل شوية.

ورغم كدا..
 أفشل نظام تعليم وأفشل طلبة وأحط مستوى علمي فى العالم.

يعنى لا دنيا قامت ولا دين قام.

والنتيجة:

وبعد سنين لما يكبر العيال ويطلعوا بشهادات دراسية وتَمكُن من لغتين أجنبيتين نتفاجئ بإنهم مابيعرفوش يقولوا كلمتين عربي على بعض أو يقروا آية قرآنية بشكل صحيح وإذا سألته حافظ جزء "عم" يقولك عمو مين، ونتصدم بأنهم أنانيين مايعرفوش غير مصلحتهم وبس.

اللي يجنن ساعتها إننا بنستغرب ونقول..
ليه كدا بس يا ربي أنا قصرت في إيه ؟!!
لا ماقصرتش خالص بالعكس..
دا إنت طَوِلت وكَبرت وعَلِيت بس كل المشكلة ..
 إنك نِسيت تِرمي الأساس صح فكان حصادك هشيم

أنا مش بقول كده علشان ازعلك أو أهبط من عزيمتك .. لأ
أنت كل اللي بتعمليه صح ، وواجب عليك
لكن في أوجب منه لازم يتم معاه..
هو ربنا خلقنا ليه؟
السؤال دا مش لازم يفارق ضميرك وعقلك وقلبك.
أنا قلت لحضرتك ولسه قدامنا وقت ، يعني ممكن نبني صح.
مع العلم مش كل الامهات بتعمل كده ..فيه وفيه. ...الا ما رحم ربي ...مش عاوز حد يزعل مني ...اني احبكم جميعا في الله .... كل عام وانتم جميعا بخير وسلام. ..تحياتي حسن سعيد حسن