الولد الشقى حلقه رقم 10
★★★★★★★★★★★
بعد السلام والتحيه والحمد لرب البريه والصلاة على خير من وطئت الأرض قدماه
نبدء حلقتنا ومرحلتنا الجديده الا وهى الاعداديه وما ادراك ما الاعداديه دخلنا كده على مدرسه بنين فقط. موضوع المشتركه دى مش موجوده وايضا انتقال من مستوى القريه إلى مستوى اعلى قليلا طبعا هنصحى بدرى شويتين عن ابتدائي علشان المسافه بعيده هقولكم على وسائل المواصلات أيامها أو حاجه متوريجل هى مسافه لاتقل عن اتنين كيلو متر ولك طريقين ما فيش تالت يا ترعة المنصوريه ياشارع زغلول
وفيه ناس بتروح فى ايد ابوهم وهو رايح شغله
وناس ابوها بياخدهم وراه على العجله
ناس زى حلاتى كان عندنا فى العيله جراچ كبير مليان عربيات نقل بتاع الزلط والرمله وكانت عربيات مقولكش ابكي بير. منتهيه الصلاحيه يعنى اللى يحب النبى يزق تصحى من النوم يا مؤمن قول الساعه خمسه ونص وامك الله يرحمها مشغله وابور الجاز ابو فونيه الوشاش هى تصحينى والوابور يوش وانا أشد فى النوم والله صوت الوابور الجاز مع النوم له طعم تاني خالص. المهم تصحى من نومك وتشد كوباية لبن صابحه ولقمه ناشفه تفتها فى اللبن وتطلع تزوق فى العربيات علشان تدور ولما تدور ياريتك هتركب فى الكابينه دا انت يا محترم هتسطح فى الصندوق والجو برد وساعة صبحيه يا جدعان يطلع عم فلان السواق بينا ومره عاوز يصطبح ممكن يركن شويه على الطريق يأكل يشرب شاى وممكن يشرب حجر شيشه عادى واحنا مستنينه يعنى لو خدناها متوريجل كان ارحم بس اهى عاده متواريثنها الأجيال كل اللى رايح شارع الهرم او المدارس الثانويه والاعداديه لازم ساعة التجمع عند الجراچ الصبح بدرى منه العيال كتير والعربيات عاوزه زقه ومنه توفير مصاريف مواصلات ومنه تبقى مع الحاشيه...
ركبت العربيه ويجى عند شارع المدرسه المفروض يهدى السرعه شويه الراجل كان لسه بيتحايل علينا علشان نزقه الوقت جه دوره مايرضاش يهدى ويجرى بسرعه والعيال تنط من على العربيه وانت وحظك تقع على دراعك على دماغك المهم انا كنت أول مره اركب معاهم ولابس اللبس الجديد وبنطلون كاوو بوى كاروه والله كان نفسى اتصور بيه بس يا خساره العربيه طويله وانا بنك من فوقها وهى بسرعتها ادحرج على الأرض والف تلاتين اربعين لفه على الاسفلت الاقى كل حته بتجيب دم والبنطلون من على ركبه راح شراشيب لو كان اليومين دول كانوا قالوا موضه المهم روحت المدرسه بدمى وبهدومى الممزعه وحضرت اول يوم إعدادى لحادثه وجرجره على الأرض قولت يا سنه سوخه كان مالها ابتدائى مكنا جنب البيت وبنروح ونيجى من غير بهدله.
طبعا المدرسه أدوار يعنى كبيره وحوش واحد كبير والمبنى من تلات ادوار فى تلات مراحل وسنه اولى إعدادى كنت فى ١٢/١ يعنى اخر فصل فى سنه اولى دخلنا الفصل وأول حصه انجليزي انتوا عارفين الانجليزى ده اوله اولى إعدادى يعنى مكنتش نعرف يعنى ايه انجليزى ماهو حتى الافلام الاجنبيه منعرفش عنها حاجه والهندى كان لسه مطلعش دخلت علينا الأبله زينب وقال ايه فاكره نفسها دخله على تناوله انجليزى قال جود مورنينج يا ولاد كله بلم
هى قالت ايه من هنا لهنا قعدت تشرح طول اليوم فى جود مورنينج Good morning من اول حصه عرفت جود مورنينج يعنى صباح الخير وعرفت استهجاها يعنى الاسبلينج بتاعها..
برضو الاستاذه دى سابت أثر كبير فى نفسى لانى من اول يوم فهمت حاجه اتمرع بيها على اللى ساب المدرسه من ابتدائى وهو لسه صاحبى عاوز اعرفه العلامة حلو...
والى حلقه اخرى وموقعه أخرى من مفردات ولد ف اولى إعدادى
ليست هناك تعليقات:
إرسال تعليق