15- الولد الشقى.بقلم /بطل سلآم

الولد الشقى واخر حلقه رقم 15

★★★★★★★★★★★★

سننتقل من مرحلة الولد الشقى إلى اولى مراحل الشباب والطموح وإثبات الذات بعد أن تعثر فيما مضى

دخل الولد مدرسة تجاريه ليحصل على شهاده متوسطه فهل سيعى الدرس ام أنه يعيش بنفس طريقة الاعداديه فعلا ازداد بؤسا ازداد عناد وازداد أيضا وتحدى حتى لما فيه خطأ التحدى لمجرد التحدى عقليه كانت تحتاج إلى مثل أعلى تحتاج إلى قدوه والى تخطيط مستقبلى يعمل على رفعة الفرد والجماعه وانما هى مرحله تخطناها بحلوها ومرها وذلك تقدير العزيز العليم ..

مدرسه ثانوى انفتاح آخر يعنى الطلبه مش ضمن المربع السكنى زى إعدادى دى جايبه من اغلب المحافظه وتعرفنا على شخصيات غريبه مع انها كانت عسكريه المفروض فيها ظبط وربط ولكن انسى كانت سبهلله المخدرات كانت تباع فوق سطوح المدرسه انا صحيح مكنتش من ضمن المتاجرين أو المكيفين ولكن من باب العلم بالشيء كنت لابد أن احتك بتلك الاشخاص من باب التفاخر انا زميلى واد مخربش وبتاع مخدرات وبرضو اهو بينفع فى أمور شقاوه ومن باب التحدى محدش يعلم علينا أو يبقى شقى اكتر من شقاوتنا وكنا بنهرب كتير كنا مسمين الباب العادى باب الاداره والسور باب الوزاره فكان فيه مدرس مش عاوز احضر له حصصه فدخل علينا قولت له اشوفك بخير فقال رايح فين قولتله مروح عندى مشوار قال الباب مقفول والنقيب بيومى مش هيفتح قولت له انا خارج من باب الوزاره المهم كنا فى اى وقت نروح وفى اى وقت نيجى وفى اخر امتحان للدبلوم كان فيه واحد محترم من الدحيحه وكان حرفه الابجدى ب أمام بالظبط وكان يمسك ورقة الاسئله يجاوب عليها كلها وانا قاعد وراه زى خيبتها فكنت أقوله وسع ياض بكتفك ده

يقولى مذاكرتش ليه أقوله مبعرفش اذاكر هتغششنى ولا لاء المهم بصراحه وللامانه هو اللى نجحنى وسقط هوا زمان قلنا مكانش فى ملاحق ودور تأتى فى الشهادات خالص هو كان شاطر فى كل حاجه الا الاله الكاتبه وانا كان نفسى افيده فى الاله الكاتبه بس ماينفعش المهم انا نجحت بمساعدته وهو مسكين عاد السنه هو بصراحه أكن له كل التقدير والاحترام من يومها ..

تخرجنا من المدرسه التجاريه وانتظرنا الجيش ودخلنا الجيش بعد أحداث الأمن المركزى بشهور وكان مازال ابوغزاله القائد العام للقوات المسلحه ودخلنا سلاح قوات جويه كان بيقولوا عليها الكعب العالى اتاريك يا رضا طول عمرك كدا من المركز تدريب خصصونا سرية الهاون مدفع ٨٢ م م هاون وده بيضرب من خلف ساتر كنت معجب جدا بموضوع السلاح ده انك تصيد حد وانت مش شايفه بس عارف أنه خلف الجبل دم الموضوع بالنسبه لى كان حب للسلاح مش للصول الذى يضربنا عليه أخذنا الفتره التدريبيه بمركز التدريب كله على بعضه حوالى ست شهور واترحلنا وكنا فى قاعده جويه اتارى الكعب العالى مش لينا احنا زينا زى كتائب المشاه فحت وردم احنا الخدمات واحنا الحراسات على دوشم الطائرات وأماكن الوقود وبيارات الزخيره الموضوع كده مش كعب عالى احنا تحت الكعب بالظبط تلف النمره بتاعتك وتطلع بعد طابور الهتاف إلى مكان الخدمه شايل مرتبه وتلات بطاطين وسلاح وتمشى اكتر من ساعه الا ربع على ما توصل للخدمه والخدمه برينجى وشينجى يعنى ما فيش كينجى اتنين بس وبين كل خدمه وخدمه حوالى ربع ساعه ماشى يعنى لو حصلك حاجه محدش هيسمعك اصلا ومافيش أجهزة لاسيلكى تربط بين الخدمات زى الوقت العمليه سهله وبسيطه ومتقدمه والمرور على الخدمات كان لابد من سياره ماينفعش الضابط النوباتجى يمر مترجل ..

بكره هنحكى على الضابط الغلس فى نوباتجيته ولازم يمر ويحبس ناس كل خدمه ليه لابد من سجناء وليلته الطويله معايا..

اقولكم مع السلامه