كل يوم نسمع ضريبة
ملها معنى وفيها ريبة
حاجة خلت عقلي تايه
هم ايه فاكرين نهيبه ؟
المدارس هيه هيه
والمرض واخدنا غيه
حتى لقمتنا ضنينه
تبقى ليه فينا الرزيه ؟
يللي عايشين ف المكاتب
إرحمونا الهم راكب
حسوا بالغلبان وجوعه
من كيعانا كله شارب
الضريبة على الكلام
والضريبة على السلام
والضريبة لو هتصحى
والضريبة لو تنام
يعني لو مولود يجيلك
اخنقه يحسن يدينك
يتطلب منك ضريبة
تسجنك انت وسنينك
وان حلمت إنك هتملك
شقة ولا بيت كمان
الضريبة هتتني وسطك
ي الهدد يمحي الحيطان
يعني م الآخر هتدفع
لاجل غيرنا يعيش ويلمع
مش مهم نعيش عرايا
المهم الدولة تشبع
هيه دي مش تبقى خيبة
الوشوش بتبات كئيبة
كارهه يومها وكارهه روحها
وعايشة ف الوطن غريبة
مين بيجني م الغلابة ؟
مين بيخلي العيشة غابة ؟
مين بيستمتع بموتنا
مين رامينا للديابة؟
ارحمونا ما عدش باقي
غير شوية من بواقي
لو هتخدوهم خدوهم
ياتسيبونا لل باقي ¿¿¿¿¿¿
إبراهيم فهمي المحامي
١/ ٣ / ٢٠٢١ م
ليست هناك تعليقات:
إرسال تعليق