رايح .... قصيدة للشاعر / إبراهيم فهمي المحامي
رايح
،،،،،،،،،،،،،،،
أنا رايح ومش راجع
هسيب الذكرى ويّاكم
تركت معاكوا أحلامي
وقعدة حب عشناها
وسهراية وضحكاية
وشوقي لمّا بلقاكم
هسيب بينكم حكاياتي
عن الحلم اللي كان بينّا
وعاش مخنوق
تحاوطه العتمة من يومه
واخرتها بقى مسروق
بسيف الغدر حاربونا
وباعوا الحلم جوّه السوق
وقالوا ع اللي راح منّا
ده كان محقوق
جريمته انه كان حالم
يشوف بكرة وكله شروق
خدونا في سكّة مش لينا
باعونا حتى أسامينا
رمونا بتهمة المجاذيب
وعشنا الغربة جوّه البيت
بنستنّى يجينا الموت
نتخبّى في عتمة خوف
وحتى كلامنا من غير صوت ،،،،،،،
ليست هناك تعليقات:
إرسال تعليق