ألفين سلام ألف تحيه
للفلاحين المصريه
اللى ف قلوبهم طرح الخير
وطرحهم نور لعينيه
م الصبح بدرى تلاقيهم
ع الغيط رايحين
والارض طارحه لأهاليهم
فل وياسمين
الله علينا وعليهم
ناسنا الحلوين
شمس النهار ليهم طارحه
ألفين فرحه
والضحكه بتحوم حواليهم
لا بسه الطرحه
والفاس بتحضن ف ايدهم
من حواليهم ..أشجار طارحه
طارحه السعاده لبلدنا
وشايله خيرها لأولادنا
يا فلاحين الف تحيه
يا محلا من ايدكم زادنا
بالطين بتتحنى ايدكو
والورد بيفتحح ليكو
كل الطيور فوق اغصانها
بتدعى ربنا يحميكو
القمح سنبل علشانكم
والقطن ساكن احضانكم
والمروه نهر بيرويكم
بالحب شايلين اوطانكم
ألفين سلام ألف تحيه
لأبو طقيه وجلابيه
من مصرى عاشق لبلاده
للفلاحين المصريه
كلمات / رضا أبو الغيط
ليست هناك تعليقات:
إرسال تعليق