** أنا والصوره ...!!!.‫ بقلم الشاعر الرائع / #‏سمير_شومان‬

*** أنا والصوره ...!!!***
..
أنا والله مُش فاهمِك
ومُش فاهم كدا مشاعرِك..
ولمّا أبعد بعيد عنِكْ
بأحس إني كتير شبهِكْ..
..
بأحس إنِك ملزماني
وإنتِ وبس فاهماني..
ما بين كُل البني آدميين
لقيتِك أنتِ سمعاني..
..
حاجات جوايا مَكْبوته
وكان نفسي تكون ليكِ..
وتبقي معايا مَبْسوطه
وأشوف الفرحه في عينيكِ..
..
نِكَمّل عُمّرنا مع بعض
بِفرّحُه ويّا أحزانُه..
نِخاف دايماً قوي علي بعض
ونبقى الشوق وعنوانه..
..
ويااااا فرحَه متمّتشي
ومعرفش السبب كان مين..
أكيد أيامنّا والدُنيا
دا قدري أعيش لوحدي حزين..
..
وأحِنْ...عشان مبعرفشِ
كدا ..أختار لقلبي حبيب..
يا حُب عِرفته م الأول
وم الأول..مكنشِ نَصيب..
..
مكُنتش عارف المكتوب
مكُنتش فاهم الصوره..
وكُنت بأبص ع الدنيا
وأنا قاعد في مأثوره..
..
ولمّا نِزلّت في المَلعب
لقيت كُل الحقايق غير..
جميع الخَلق دي بتلّعب
وأنا فارد جناحي بأطير..
..
سلام ليكِ
يا أحلى صوره في الألبوم..
يا أجمل بنت حَبتها
وآخر بُوسه قبل النوم..
..
سلام ليكِ يا أغرب قصه
في كتابي ....ومَإكتملتِش..
سلام ليكِ يا أحلي قصيده
حَسيتها ...ومَإتفهمِتش..
..
سلام ليكِ يا قهوه زياده
كالعاده.....ومإتعملِتش..
يا شيكولاته في حليب دافي
يا آخر واحده في سجايري
.................. ومإتشريبتش..
..
سلام ليكِ ولعنيكِ
وللحُب اللى راح ولا جاش..
وللقلب اللى ودّعته
وبَعدك انتِ مات وما عاش..
..
سلام للدُنيا علشانِك
وعلشانِك هأبطّل أطير..
ومهما هأحب من بَعدِك
دا صعب خلاص
_حبيبتي_ أغير..
دا صعب خلاص
_حبيبتي_ أغير..
سلام ليكِ.
..
‫#‏سمير_شومان‬