************
لحظة فاتت لحظة جاية
والحياه آهي هيه هيه
ما في حاجه بتختلف
شمس غايبة
وليل طويل
والأماني مستحيل
والطيور لو مرة غنت
بعدها نسمع عويل
شهر رايح شهر جي
والأمان فارق الحي
والقلوب الصافية باكية
والقمر مبقاش فيه ضي
دم سارح ع الطريق
لسه صوته بنسمعه
حق غايب ف الحريق
والسلاسل تمنعه
والشجر دبلان وخايف
تقلعه الريح والعواصف
والبراءة ذكري غابت
من عيون كل البشر
فيه وحوش جوه العيون
جوه القلوب
مليون حجر
يا سنين بتتباع من غير تمن
يا طريق مزروع فيه المحن
ليه كل حاجه بتتخطف منا
ترجع لنا كفن
ده احنا عشنا الغلب ياما من سنين
ولسه بنستني الزمن
عدت سنة !
طيب ايه كمان ؟
م زمان عدي علينا مليون سنة
وكتاب تاريخ مليان أسامي مشكلة
صالح وطالح وابن مليون كذا .....
كله بيمشي علي الجثث
لاجل الكراسي والمنن
برضو الفقير هو الفقير
بره برواز الصور
م انا أصلي واحد م البشر
طول عمري دافن راسي تحت مخدتي
وبقول قدر
ارضي وسايس لقمتك
أو فرشتك
وبلاش تقلب ف الصور
مين انت
مين انت لاجل الحلم يعرف سكتك
د انت يادوب ورقة شجر
دبلت
وجفت من قبل الخريف
بقي شئ مخيف
إنك تلاقي الخوف بيقطع سكتك
او خطوتك
أو كلمتك
أو غنوتك
وتلاقي كل الدنيا تتفرج عليك
والدم نازل لابس توب دمعتك
ودي أخرتك
في حياه مافيها غير شوية هم
وفيروسات ف الدم
وسلاسل الظلم اللي كابس علي معصم
والسحرة يقولولك
فارقنا ياعم
فارقنا يا عم .....
ودي أخرة السنين الضم .....
بقلم/ إبراهيم فهمي المحامي
