رساله الى الجده ************بهاء يسرى

لسه يا جده ..
طعم الزبده 
بطرف ايدينك 
زى ما هوَ
يدي القوه .
اطول اشب 
زى الجد 
أهد الارض ..
وكيفه الجد ؟!!
واحشنى يا حج ..
لسه يا جِد 
فساعة الجَدّ ..
ترسم بايدك الف اشاره ..
تدى اوامر .. 
ك امير بحااره . ؟! 
...
لسه الزير 
بيسقع ميه 
انقى واطهر 
م الحنفيه ؟!!
..... 
وانتى يا عمه ؟!!
شاده الهمه . واقفه بزمه 
وفاتحه الباب 
للاحبااب 
ومقابلاهم بالترحاب ؟!!
....
والعم الخوجه .. 
داخل الاوضه 
ف اخر الداار 
وبكل . اصرار 
شرح الحصه للطلاب ؟!
تقرا وتدرس .تلقى جواب ؟!
ولاا مليييم !! 
ده ثواب ف ثواب .. 
*****
يووووه .فوتك 
يا جده فالكلام . 
دول قلعوا النخله ..
وهدوا الدار 
هجروا الغيط .
قلبوها بازار 
.ابراج وعماير .. 
وسانسير بزرار .. 
****
واتغير طعم الزبده يا جده 
اصبح مر ..وزى الحنضل
حتى السكر
طعمه اتغير 
****
وبدون البركه ..
تعبنا ياجده 
العمر اتقصر 
والحال اتبدّل 
ومعادتش الزبده 
زى الاول... 
******