بتعدي عليك اوقات بقلم اشرف احمد

بتعدي عليك اوقات
بتحس ان انت لوحدك
وساعات تتمنى حاجات
والحظ تملي معاندك
ويخونك كدة تفكيرك
مش عارف فين مصلحتك
محتار مع مين تتكلم
وساعات بتشك ف نفسك
الناس بتبص عليك
وشيطان ماشي يوسوسلك
تتمشى يادوب كام خطوة
وتقف وتشك ف لبسك
وتقول انا ايه اللي حصلي
تتبسم وتقف تضحك
وتحس فية حد وراك
وخيالك يسبق رجلك
وتحط ايدك على راسك
وتحسس كدة فوق شعرك
ولوحدك عمال تنهج
م المشي بيقطع نفسك
واديك لتنين في جيوبك
سقعان والبرد مصاحبك
والليل بيخش عليك
والظلمه توقف قلبك
وتحسس كدة ع السلم
تفتح والباب بيعاكسك
تدخل بشويش بالراحه
ناسي فيه حيطه ف وشك
تدخل بدماغك فيها
م الخضه بيخرس حسك
وتقول الحمد الله
دة طبيعي لأنك وحدك
والنور اهه ييجي بسرعه
وتقوم وتنفض كمك
وتبص لكل هدومك
تقلع ولاحد يساعدك
وبسرعه بتلبس غيرها
ومافيش عير هي بيجامتك
تتحرك جوة الشقه
وتبص ثواني في مرايتك
وتفكر ايه راح تعمل 
وبتمسك ايدك قلمك
وبتسرح لحظة ثواني
مستغرب في اللي حصلك
وبتسهر عقلك صاحي
في العمر دة عايشه لوحدك
وبتسمع برة آذان
تتوضى تصلي ف فجرك
وبتزل منك دمعه
وبتدعي وتشكر ربك
وبتدخل اوضة نومك
وتحط ايدك على خدك
وبتسرح ويا همومك
وتنام ولا حدش جنبك ...