كل واحد فينا ناجح الشاعر / ناصر عبد المقصود

كل واحد فينا ناجح
بس يبدأ بالنظـــــام
بالأمل يرسم طريقه
بالعمل مش بالكلام
اقتل اليأس وفريقه
وانسى أوهام الظلام
خلى أحلامك مرايا
وابتدى منها الحكاية
ضحكتك هتكون نهاية
وتبقى فى الأخر وسام
اطرد اليأس بكفـــاحك
واشترى منه سلاحك
تضربه ويظهر نجاحك
بالإرادة والعـــــــــلام
أوعى يوم الخوف يهزك
أو كلام الناس يضايقك
بالأمل هتقول لأهــــلك
إن فكرك كــــان تمام
الرسول كان فى البداية
لما كان صاحب رسالة
انكروا منه الهـــــداية
والجميع حاربوه كمان
بس فى الأخر حبيبنا
بالأمل نور طـــريقنا
وبكفاحه بل ريقنا
والجميع تعظيم سلام
مستحيل الناس تساندك
هتلاقى مليون يعاندك
مش مهم الحل عندك
قوم وانسى الناس تمام
أوعى تستسلم لقولهم
بكره تلقى كمان قبولهم
كلهم هيهزوا طولهم
ويقومولك بـــاحترام
كل واحد فينا ناجح
بس يبدأ بالنظـــــام
بالأمل يرسم طريقه
بالعمل مش بالكلام