(فاكر)..........شعر عامية ...الهام شرف

فاكر يا قلبي
الشوق مخبي
غنوة جميلة
لأغلى حبايبي
وعيوني تلمح في الفضا
أجمل عيون
بتقول كلام
أنا قلت عايشة في الحقيقة ولا ف منام
ولقيت إيديه تتمدلي مديت أوام
إيدي ف إيديه
وانا كلي ليه
وسرحت فيه
فاكر يا قلبي
وحشني مرة
ونده عليه لبيت نداه
قلبي اصطفاه
بنده عليه
فاكر كمان لما الشجر وقت السحر
حضن القمر كان نوره بيغطي عليه
إياك يا قلبي تهجره أو حتى تتمرد عليه
فاكر يا قلبي وحدتك مالي عليك دنيتك
ما عرفتش انت ضحكتك إلا معاه
تسهر معاه ويحس بيك وتحس بيه
وتلاقي كل الدنيا فرحة بتقيد شموعها حواليه
فاكر يا قلبي
قلبه الحنين قلبي الضعيف وسؤال مخيف
من غيره شكل الدنيا إيه؟
بوصف هوانا ف يوم لقانا والفرح يتصاحب معانا
والناس تهني كأن عيد وميلاد جديد
فاكر يا قلبي
ليالي حلوة عشتها وعشقتها
والطير يرفرف بجناحاته
أسمع آهاته
تنهيدة سابحة في الفضا
بتغني ليه
فاكر كمان لما المكان يزداد جمال إكمنه فيه
يا روحك انت الطيبة تسمحلي أتغنى كده
إسمك ساعات تندهلي كل الدنيا بيه
اسمك ساعات برسمه وبنبض قلبي بلونه
وبشوقي بسبح في الفضا بيننا الرضا
يا حب خليني كده إشهد عليه انا روحي فيه
فاكر قمرنا لما سهرنا على شط بحر وف حضن ليل
وشاورت لي بصيت لقيته بدر البدور كامل يدور
قلت السما مكسوفة منه
رديت عليك كسوفها وارد
يا أحلى مارد
حتى لقيت صورتي ف عنيه
فاكر يا سيدي
دمي ف وريدي
سكنت فيه
سامعاك تغني
لحن التمني
البحر موجه
فنان وفني
وبعلو صوتي
لو ناوي موتي
تعيش أسير في البعد عني
فكر دا كله ولا ناسيه؟