كنت فاكر .... قصيدة الشاعر الكبير / فهمي علي

كنت فاكر ان بكره
جاى و جايب ضحكة حلوة
يعنى هيغير طباعة
و الدموع راح تبقى غنوة
كل حاجة نفسى فيها
راح تكون ف ايديا بكره
روحى فرحت .. ايوا فرحت
فكره جابت الف فكرة
هاحضن الضحكة البعيدة
و امسك الاحلام بايدى
قلبى هيقابل حبيبه
و الصفا يجرى ف وريدى
كل ما اتمنيته حتما
مش هيبقى بعيد عليا
روحت رتبت الامانى
اللى كانت متدارية
جبت ورد و لونه يسحر
اللى ابيض و اللى احمر
فل على ياسمين و نرجس
ف الفازات و سقيته سكر
كاس عصير علشان باحبه
قعدة حلوة ف العصارى
ضوء خفيف طيب و هادى
عصفورين لونهم كنارى
هو ليه الليل مطول
و الساعات ... مش عايزة تمشى
طب انام و الفجر اصحى
بس قلبى قال .. ما انامشى
ساعة جرت ساعة تانية
ساعة تالتة و ساعة سابعة
ليلى ليه فارد ستايرة
ليه يا عينى فيكى دمعة
الصباح رافض يقرب
شمسى ليه مش راضية تتطلع
الرضا بشويش بيهرب
حبل صبرى خلاص .. بيقطع
لسه لون دنيايا ضلمة
بس نجم سمايا مطفى
القمر مخنوق بيبكى
دمعته .  نزلت فى كفى
نظرة ع البعد التقيته
مات و ناس بيكفنوه
ميت خسارة يا حلم عمرى
مت .
يعنى خلاص هاتوه
و السما تفضل كئيبة
و كل شئ يفضل حزين
طب يا بكره كنت قوللى
قبل ما تفوت السنين
ان انا هافضل لوحدى
بعد حلمى ما مات معاك
لو تمد ايديك ..  تاخدنى
اصل انا ميت ... بلاك
#فهمى_على