مصري .. دا كان اسم الولد
كان اذكي تلميذ في البلد
وابوه سند استاذ تاريخ
موسوعة شاملة ومستند
مرت سنين كبر الولد
بين الصحاب ف المدرسة
بقي يتشهد له بالجلد
كان لما بيجاوب سؤال
ويحل له كام مسأله
يفرح ابوه ب ابنه الهمام
ويقول برافو يا ولا
مصري دا كان شاطر قوي
طول عمره ألفا ويا سلام
بالاجتهاد مش فهلوي
حافظ خريطة من زمان
كان أبوه رسمهاله بإيديه
وف يوم ما جت له ف الامتحان
كان شكل متعود عليه
النيل هنا وهنا الجيران
والبحر الاحمر من هنا
وحدودنا اهي واصلة لهنا
والناحية دي فيها الجزر
رسم الخريطة بالتمام
بمهارة كاملة و بحذر
بعد اكتمال الرسم قام
سلم ورقته وانتظر
يسمع نتيجة الامتحان
فرحة نجاحه المنتظر
وف يوم نتيجته راح قوام
ع المدرسة وسط البلد
قابلوه زمايله زعلانين
وقالو له كشف الراسبين
لقينا اسمك فيه ورد
مصري رجع يسأل أبوه
قال له يا والدي انا بعتذر
انا عندي لو تسمح سؤال
مستني ليه تديني رد
نفس الخريطة رسمتها
بالظبط زي ما حفظتها
ازاي تقوللي كلام غلط
استاذ سند قال ب ابتسام
اسمع جوابي بدون ملام
الأمر حتما فيه لغط
أملاكنا باعوها اللئام
و ميراث جدودنا كله راح
و حرم حدودنا بيستباح
صورة الخريطة اتغيرت
والعزة فينا اتدمرت
حتي الكرامة اتبعترت
وحقوقنا عقد بينفرط
أستاذ سند بعد الكلام
من قهرته وقع إنجلط
مات اللي كان رمز العلام
والجهلا ف بيوتهم نيام
أخر الحكاية و ف الختام
بقا مصري تايه ف الزحام
شارد يتيم من غير سند
عايش غريب جوا البلد
عايش ما بين ناس شقيانين
متهمشين ملهاش عدد
تستني يوم ييجي المدد
ينصفها ياخد حقها
م اللي طغي واللي فسد
ومن اللي خان والمستبد
ينجدها م اللي حصل لها
ويعزها
من بعد ظالم ذلها
وبإذن ربي يعيدلها
صورة الخريطة لأصلها
ليست هناك تعليقات:
إرسال تعليق