الوجه الآخر لحبيبتي ...قصيده للشاعر المبدع الأستاذ / فهمي علي

مش هأمن تانى ليكى 
مش هادوب تانى ف عنيكى 
مش هاقول تانى انى عاشقك 
مش هاوطى و ابوس ايديكى
ياللى كنتى العمر كله 
و الربيع و صفاه و فله 
ليه بقيتى الخوف و ذله
ليه نسيتى كلامى فيكى
ليه نسيتى ان انتى امى 
قاسية ليه و بتزيدى همى 
و قاعدة ف الاندال تلمى
و اللى عشقك بيناديكى 
بيعتى ليه قلبى اللى حبك 
و اللى كان ف الشدة جنبك 
ليه مسكتى ف اللى سايبك 
و اللى عمره ما كان شاريكى 
توهتى رغم السكة واضحة 
و الامانى لسه طارحة 
الف ضحكة و الف فرحة
و الامل لساه غاويكى 
فوقى م الغفلة و قومى 
و اغسلينى من همومى 
صلى تانى و يلا صومى 
رجعينى اجري عليكى 
فكى قيد الخوف دا عنى 
و احضنينى .. او تمنى 
و انسى ظلمك و التجنى 
روحى هتضلل عليكى
#فهمى_وعلى