سنتـــي الحـــب .. ميـــت فــــدان ***** ✍.... عبيــــــــــــــر الجنـــــــــدي ....

أنا عارفاك .. تماما زي معرفتى ..
لنفسي وروحي .. 
لأ يا حبيبي .. لأ .. أكتر 
بتكتب شعر فوق توبي .. 
بتاخد إيدي لو أعتر 
بتتحدى الظروف وتجيب .. 
زهور من دنية الأشواك 
ملاك صافي .. وأحلى ملاك 
أبص بقلبي م الشباك .. 
تجيني زي طير مطلوق
جناح الشوق .. 
أنا باهواك وباستناك على المينا 
حزينه .. أيوه يمكن اكون .. 
ويمكن نهزم الأحزان 
تعالي نخلي " سنتي الحب " .. 
ميت فدان 
أنا إنسانه كانت في احتياج إنسان 
إذا قطر الهموم خدني .. و روحت بعيد 
تجيني صافي .. في المواعيد .. وتسقينى ..
عصير الحلم .. أترجاك تكون جنبى
لأنك كل شيء جوايا .. 
زادي .. سكتي .. قلبى 
لانك حبي في عالم بدون إحساس 
لأنك دنية الإخلاص .. وأنهاري 
يا زارع كل أزهاري .. 
على أجمل ضفاف في الكون 
يعيش الحب .. لو مجنون 

جناينك لسه طارحه ياقوت على الأغصان 
ولسه انت يا ضيّ العين .. 
معايا في ألف ألف مكان 
بتدخل في الكيان فارس على فرسه 
ومركب عاشقه في المرسا 
ولا أنسى .. 
دقيقه من هواك أبدا .. ولا أنسى .. 
حكايه .. هي كل تاريخي في المشوار 
مفيش زوار لمملكتي .. 
سواك يا سَيِّد العاشقين 
يا ضوء مصباح علاء الدين .. يا إحساسي
يا اجمل ناسى .. لو لىّ صحاب تانيين 
هاجيلك يا حبيب القلب .. ما تخافشي
هاجيلك حتى لو في الصين