باكتب لك
من ديوان/ سيبنى أحلم
للشاعر/ مصطفى فريد
ابتديت أهرب من نفسى
وضعفى ويأسى
وأنا بكتب لك
أول حرف فى كلمه
عشقها القلب عشانك
شفتك جوه سطور كراستى
بتملينى اكتب لك إيه
ليه يا حبيبى تتعب نفسك
إرتاح انت
وأنا راح اقول لك
اصل أنا عارفه إيه بتحبه
وإيه فى الدنيا ما بتحبوش
ما انا جواك من أول عمرى
وجوه القلب هواك منقوش
صوتى وساكن جواه صوتك
همسك
رسمك
صمتك
حتى هدوئك
نفس الدقه فى قلبك عندى
يرد صداها ينادي وجودك
تصرخ جوه القلب بحبك
ما انت ساكنى
ومحفور إسمك
جوه القلب باسم حبيبى
ومهما بتبعد عنى وتنسى
قلبى هيفضل ليك المرسى
وان لفيت الدنيا بحالها
بين صحاريها بحورها جبالها
إنت راجع لى بحبك تانى
أصل الحب شعور متبادل
وانا جوايا مشاعر حب
تكفى العالم ليك وتفيض
ليست هناك تعليقات:
إرسال تعليق