ما تصلي ع اللي ح يشفع فيك ... قصيدة للشاعر / أحمد محمود الشاذلي

ما تصلِّي عَ اللِّي حَ يِشْفَعْ فيكْ

ــــــــــــــــــــــــــــــــــــــــــــ

ما تصلِّي عَ اللِّي حَ يِشْفَعْ فيكْ

و اخزِي الشيطانْ اللهْ يهديك 

خليّكْ حليمْ ... وبلاشْ تتعَصَّب

اصل الرسول قال إيَّاكْ تغْضبْ

تعادينى ليه . وانا ليه أعاديك 

ما تصلِّي عَ اللِّي حَ يِشْفَعْ فيكْ

ـــــــــــــ

خُدْ و ادِّي . هَدِّي . ح تفهم قصْدي 

قبل الظنون ما تجيبْ و تودَّي

مش جايزْ بينّا حقود لُهْ فِكَرهْ

عايزْ يصطادْ في المَيَّهْ العِكْرَهْ

و اطلعْ برئْ و حَ يلْعبْ بيكْ

ما تصلِّي عَ اللِّي حَ يِشْفَعْ فيكْ

ـــــــــ

لسّه قابيل و هابيل عايشينْ

وسط البَشَرْ إلى يوم الدينْ

فيه ظُلْم بجَدْ و مُش بهزارْ

و مافيش فى الحقْ صْغارْ و كبار 

و الجارْ للجارْ يْرحمْ والديك 

ما تصلِّي عَ اللِّي حَ يِشْفَعْ فيكْ

ـــــــــــــ

ابن البلدْ مَجْدَعْ و أصيلْ

يبنى البلدْ كدَا جيلْ ورا جيلْ

طولْ عُمْرُهْ غَيُورْ . وصَبَورْ و جَسُورْ

أخلاقْ . مشتاقْ سبَّاقْ للنورْ

قلبك على قلبي . وإيدي في إيديك 

ما تصلِّي عَ اللِّي حَ يِشْفَعْ فيكْ

ـــــــــــــ

ـــــــــــــــــــــــــــــــــــــــــــــــ

 احمد محمود آلشآذلي