خايف أنا
،،،،،،،،،،،،،،،،،،،
خايف عليكي يا قلبي من طعم الفراق
خايف أنا والوقت كان سباق
خايف طلوع الشمس يصبح أمس
ولاقي عتمة تهاجمني
ده المر ف الأشواق
سيباني ليه للزمن
وانا من زمن حراق
خدني كتير للخلا
ورماني ف الأعماق
هتكتب ايه يا قلم
ده الحبر جف خلاص
مش باقي غير الألم
وهم فيه غواص
عاوز أشوف فرحتي
ماليه فراغ الكاس
والقى دموع الفرح
مغرقة الكراس
غايب معاكي الأمل
والحب والإحساس
أوقات أقول الزمان
يمكن يجيب لي النور
لكن أبص ف عينيكي
ألاقي الوجع محفور
سكة طويلة ف ألم
عايش كما المشطور
أنده على الأحلام
ألاقيها جوه قبور
رحلة ما فيها فرح
ولا حتى فيها سرور
وآخرة الفضفضة
بلاقيني جوه سطور
تبكي على اللي رحل
واللي عايشها مرور
مين اللي قال الأمل
ساكن ف قلب النور
شمس النهار شوفتها
على أرض كانت بور
وخداني فين يا سنين
أنا خاطري ليه مكسور
أنا عشت بين الحفر
تايه سجين السور
حارمني من فرحتي
أو إني اعيش عصفور
؛؛؛؛؛؛؛؛؛؛؛؛؛؛؛؛؛؛؛؛؛؛؛؛
بقلمي / إبراهيم فهمى المحامى
١٩/ ٣/ ٢٠٢١ م
ليست هناك تعليقات:
إرسال تعليق