زماااان يا زمن
------------------
حاجه صعبة انك تحس إن الأمل مش جاي ليك
إن السعادة تعدّي بابك من غير ما تدخل يوم عليك
إن الحماسة يا دوب في كورة
والوطن محفوظ في صورة
وانت قاعد ع الكراسي
تفتكر زمن المآسي
ولا بتقلّب ف عقلك
عن زمن عدّى وفات
خد معاه الذكريات
خد سنابل قمح طارحه
خد معاه م القلب فرحه
خد روابط بالمحبة زي عقد وزي سبحة
بس يا خسارة ف زماننا
كله ضاع ويّا اللي ضاع
آه يا مركب بلا شراع
كل شيء أصبح صراع
النهاية
دنيا عايشينها خداع
كله مدّاري ف قناع
كله خايف من خياله
كله متكعبل ف حاله
كله بيصرّخ ف سرّه
خايف من أمر اعتقاله
ف النهاية
القمر غاب عن مكانه #
بقلمي / إبراهيم فهمي المحامي
ليست هناك تعليقات:
إرسال تعليق