أنا ماشي
^^^^^^^^^^^^
أنا سارح ف أرض الله
بدون غاية
تاخذني خطاوي وحكاوي
وسهراية
أتوه عن نفسي والاقيني
مشيت السكة وحداني
بأحزاني
بأشجاني
ألاقي دموعي سبقاني
بادور عن حاجات ضاعت
وضاع قبليها مجدافي
وقلبي اللي زمان صافي
صبح مكسور بيتعافي
أنا ماشي وهمشي كتير
واسيب أيامي مهجورة
مفيش فيها غير الأحزان
وع الجدران يادوب صورة
بتحكي عن حياه ضاعت
لروح ماتت بدون إزعاج
ماتت بس مقهورة
أيا دنيا أنا مهموم
ويوم ورا يوم
باشوف نفسي شبح لحكاية مبتورة
مفيش فيها غير الأوجاع
وعمر ضياع
وحلم قديم لقيته اتباع
لصفقة شر مشهورة
خدت وياها أيامي
واحلامي
وسابت لي شبح صورة
أنا ماشي
هتحملني الخطاوي بعيد
يجوز ألقى أمل كداب
يكمل قصة مبتورة #
بقلمي / إبراهيم فهمي المحامي
ليست هناك تعليقات:
إرسال تعليق