إغضب / عاميه
إغضب يا إنسانْ
وبلاش تعيش متهانْ
طلّع من جوّه صدركْ
بركان ورا بركانْ
اصرخ وقول الحقْ
وارفع شعارك ( لأ)
أنا عمرى مره واحده
مش راح أكون جبانْ
احرق كل الّلى خانْ
والّلى سقوك الهوانْ
الّلى رموك ف المتاهه
كبحر بدون شطآنْ
خلّيك دايماً عنيدْ
لو كبّلوك بحديدْ
إنزع قيد بعد قيدْ
وإرجع بركان جديدْ
زلزل كل المخاوفْ
صدّقنى
الظلم خايفْ
لو شاف منك رجوله
هيفكر من جديدْ
مستنّى أيه دليلْ
إنك عايش ذليلْ
الّلقمه مش لاقيها
والعتمه طريق طويلْ
الظلم سانن سنانه
وعاجبه فيه جنانه
طايح هو وحصانه
يشوّه كل جميل
مستنى أيه؟
حرامْ
بعد ما خرص الكلامْ
آهى موته والسلامْ
بس تموت مش ذليلْ
يا ناس قلت الّلى عندى
أنا منكو مش جى هندى
نفسى تصونوا الكرامه
وتفوق تانى الشهامه
ونهد الظلم مره
ونكون للناس علامه
بلاش بينّا الملامه
نتجمّع بابتسامه
والخوف لو سد بابنا
نطلع زى الغمامه
قدّام عينين الخوفْ
ماشيين بنقول له شوفْ
جوّانا إيمانّنا ساطع
ينزل سيول وخسوفْ
الّلى يعادى الحياه
يستاهل ألف آه
الدنيا واسعه يا صاحبى
ليه همّا عاشوا
واحنا لآ////////
بقلم الشاعر / إبراهيم فهمى المحامى
22/1/2015
ليست هناك تعليقات:
إرسال تعليق