ارجعلى.. (شعر غنائى)
ـــــــــــــ
ـــــــــــــ
ازَّاي بتقول انِّي حبيبك
وانتَ معَيِّشني الحب عذاب
عند وغيره وشك وشكوى
أوْهام خاليه من الأسباب
مين كان قال الحب آلام
وشجون وظنون وعِتاب وملام
دا الحب أمان ومودَّه ورحمه
روح بتخلِّي الدنيا سلام
الحب كيان ساكن ف كيان
جوّاه هيمان عايش ف أمان
اتْنين بقوا واحد مهما يكون
ف حلو ف مُرْ ف كل أوان
والحب دا عهد ما بين قلبين
بحروف م لَّهفه وشوق وحنين
دا حنين طوَّاح وخياله بَراح
يِرْوِي الأرواح ويهنِّي العين
وعتابه سماح وعبير فوَّاح
بيداوي جراح ويطفِّي أنين
الحب دا روح دابت فيها روح
تيجي وبتروح وملكها حبيب
عايشه في سماه تتمنى رضاه
هيمانه معاه تحضر وتغيب
والحب يا روحي شِفا
حِكْمه وإخلاص ووفا
حلم جميل بيحلِّي
مُر الأيام بالصفا
والروح الهايمه بتطرح
بهجه وأنغام ودفا
شمعه لِطول الليالي
نسمه لحرِّ النهار
طوَّاف كِدا ف العلالي
طاير مالو مدار
بسمه فوق الشفايف
تِمْسَح دمْع الأحباب
وأمان ع الوِّد خايف
لو من لحظةْ عتاب
وحلاوة القرب بتسري
تمسح عرق القلوب
والكلمه الحلوه بتجري
تروي عطش المحبوب
والعين للعين حكَّايه
ف النظره ألف حكايه
تطرح ف آيات الرضا
من ألف آيه وآيه
آه منَّك يا حبيبي
ياللي آيه ف جمالك
حيَّرت الفكر معاك
متْقول لي ايه جرالك
إيه جرالنا وليه
نِسينا عهدنا
أيام الحب مكان
عيشين لُه وعايش لنا
ارجعلي كفايا ورجَّعلي
يا حبيبي فرح السنين
دا انا قلبي بشوقه معيِِّشني
دايب أشواق وحنين
ارجعلي نعيش الحب اللي
بقلوبنا عرَّفناه
واثبتلي إنِّي حبيبك
بالمعنى اللي فهمناه
،،،،،،،،،،،،،،،،،،،،،،،،،
،،،،،،،،،،،،،،،،،،،،،،،،،
ليست هناك تعليقات:
إرسال تعليق