قصيده قسوه للشاعر محمود عمار الزلبانى

قسوة
نفسي اكمل مره معاكي
اي كلام احنا بـــــــــــدءناه

ليه يشغلني بس هواكي
ويخلي القلب النوم ينساه
اول مره القلب يشوفك
دق بسرعه وقال الله
قرب عندك وانتي بخوفك
سبتي القلب يقول الاه
ياما ليالي سهرهاعشانك
وانتي بقسوه مش فكراه
كانت النجمه ترد مكانك
وقمر الليل سهران وياه
كل كلام الحب يقوله
ومفيش غيرك كان جواه
حتي العطف ماكان بيطوله
ياما نداكي ومش سمعاه
حتي ف بعدك كان يناديكي
لكن صدك كان يلقاه
ومهما عملتي لسه شاريكي
بكل الدنيا وليه بيعاه
القلب اختارك حبك بدري
وانتي بنار هجرك كوياه
القلب في حبك خلص صبري
حتي الصبر احتار وياه
عاوز اقرب منك خطوه
افتحي قلبك ليه قفلاه
شوفي جمال الدنيا الحلوه
وقلب يحبك ليه سيباه
اخر مره حذل ف قلبي
وهشيل منه مر الاه
خليكي فاكره الصد لحبي
ولا عايز اعرف مين ريداه
كل منايا عيونك تفرح
ف اي مكان قلبك يهواه
رغم البعد لقلبي هيجرح
لكن الفرح لجرحي دواه
شوفي حياتك شقي طريقك
وانا مع قلبي نعيش ذكراه
ف قلب بحورك انسي غريقك
يمكن يغرق حبه معاه
او يرسي ف يوم علي شط عيونك
اللي سهامهم جات جواه
ظلمتي القلب بسحر جفونك
طب قولي لنفسك ليه ظلماه
قلبي هيفرح لو حنيتي
لأن هواكي كل مناه
يما بعدتي ورحتي و جيتي
قلبي لقلبك يستناه
مش حتلاقي حد يحبك
زي ما حبك قلبي وتاه