مستنيكي...محمد عطوه

كنت امبارح مستنيكي تطلي عليا من التليفون
كل شويه ابص بقلبي و اقول راح تكتب
أي رسالة
"انت وحشني"
"انا مقدرتش"
"انت ف قلبي مهما تطول بينا المسافات"
بس حبيبتي الوقت سرقني
عدی اليوم و الصوت موصلش
انا مش عارف ايه أحوالك
انتي بخير؟
ردي عليا الله يخليكي
حاسه بإيه؟
كلتي كويس؟
نمتي كويس؟
خرجتي امبارح للمشاية؟
اتفرجتي علی البرنامج و اتنرفزتي علی احمد موسی؟
اهدي يا عمري
باسم يوسف راح امريكا
يسري و ريم رفضوا التطبيع
الصوت واطي؟
مش سمعاني؟
ليه سايباني و ناسيه معادنا؟
هو الليل بعد ما غيرنا توقيت شتوي طعمه اتغير؟
و لا أنا بحلم إني قابلتك و انتي أساسا مش موجودة؟
انا ع الفيس مستني ظهورك
هند ، أميره ، أو اسماء
انا علی فكرة مش متأكد إني قابلتك
بس الصوره ف حجم البسمة
علی الاسفلت
و انا متسرسب ع الطرقات
راكب عجله بتمشي ببطء
كل الناس بتعدي عليا و متشوفنيش
هو انا عايش؟
ليه يا حبيبتي مبترديش؟
يمكن ميت!!!
طب هزيني و رشي الميه علی الخدين
يمكن بس انا مغمی عليا
و بعد شويه حافوق علی طول
و ارسم لوحة بحجم الفرحة
تحت عينيكي.