شىء جديد...شعر عامية...الهام شرف

لما إبنك يبقى جنبك ما تلاقيه
تفتكر إيه العمل
لما دمعة عينه تسكن وتجافيه
وانت مش قادر عليه
لما كل الناس تقولك إنت مين
ازاي وليه
لما بتحاور شفايفك كلمة منك
أو تخاصمك
لما غدر الكون يحطك فوق سلاسل القدر
إنت شكلك يبقى إيه
لو تلاقي عيون محبة حبة حبة بتلاقيها
خاينة مش قادر عليها
ده يا قلبي اللي حصل
ده يا عيني اللي رإيته واتغفر مهما حصل
بس قلبي دموع بتنزف لما يرجف
بس إيدي بحس فيها العجز مني غصب عني
بس حزن ماليني شايله فوق كتافي واتقهرت ..
نفسي مرة ف حضن دافي
نفسي ناس بتحب ناس
دايبة في عيون الخلاص
نفسي اقول ان الخلاص وأد أفكار البشر
وأد كل اللي يحطم صورة أقوى من الحجر
صورة الصمت الرهيب
جوه قبر الخوف تملي ينفجر
واه يا قلبي..عيني شافت م الخيانة كتير كتير
زي طير الليل بيصرخ ردده صوت الغفير
زي ما يكون انتصار..ضرب نار
زي دم بيسري فينا شراع سفينة ما فيش منار
زي ما تكون القيامة قربت ناس على وشوشها الفرار
والسبب ..الشمس طلعت م الغروب
قد إيه وقت الهروب كله مرار
قد إيه انا خاضعة ليها هايمة فيها
قد إيه صاحب يمد الإيد قاطعلي الوريد
قد إيه الدم يهرب بيتي يخرب وانت قلبك صار حديد
قد إيه الكره فينا جاي يعتب يوم علينا ..إحنا من صنف العبيد
شد حيلك يا زماني جاي بحلم بالأماني بيوم جديد
بس فين أمي اللي وعدت إن هيجيلها وليد
الأمل فينا اللي ضاع بس يمكن ييجي عيد
بس يمكن....ييجي عيد