يا خلق يا هوه ... كلمات الشاعر / أحمد جمال

ياخلق يا هوه
هل ممكن حباية الفول..
تتقسّم وتكون نصين..؟؟
يبقى النص الاول ناعم
وردة بتسحر أيها عين
بس النص التانى بيلسع
نحلة بتجرى شمال ويمين
وبتختار م الورد...جماله
عقله ..قلبه..
أيها حاجة ف غمضة عين
رغم دا كله...
النصين يصبحوا عاشقين...؟؟
*****
ينفع يعني..
يبقى النص التانى صغير
يمكن كده ماشى ف العشرين
أما النص التانى مشيب
ماشي مابين خمسين ....ستين...
حد يصدق دا يا عاقلين
*****
ينفع يعنى...
يبقى ما بينهم
قلب بينبض بين جسدين..؟؟
أو يربطهم أفكار وحدة
وتعيش فيهم روح ..بروحين .... !!
*****
ينفع هذا....
إن الفولة تكون جزئين
إل رابطهم..
وبيجمعهم...
أقوى وأجمل من جبيبين
وان النصين دول راضيين
إن حياتهم تقسى عليهم
تفصل بينهم 
أرض... وعمر...
وسكة طويلة...
كأن حياتهم ورا جبلين
بس الاغرب..
إن النصين سوا عايشين
فولة إتقسمت إلى نصين
*****