أنا إنساااااااان
‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘‘
أنا ع الوعد مستنّى
تردّى ف يوم وتحنّى
يا شاغلة القلب والنّنى
أنا عاشق
وشوق العشق صبّرنى
على وعد إنى يوم أحظى
بنجمايه تطمّنّى
عانيت م اليأس والغربه
وغدر الدنيا والصُحبه
وقلت يجوز فى مشوارى
أقابل قلب متعافى
يكون صادق أمين وافى
يحاجى ع اللى فاض منّى
ويشعل ضيّه ف طريقى
ويبقى حبيبى وصديقى
لكن مشوارى لسّه طويل
مفيش فيه ضى للقناديل
وانا وحدى
بقول شِعرى
حروف تنبض ف وجدانى
بكل حرارة المشتاق
بقول يا دنيا نسيانى ؟
نزفت الحزن من قلبى
وشريانى
جهرت بصوتى يا دنيا :
أنا إنسان
لا زال عايش ومش فانى
حياتى ليه معشّش فيها أحزانى ؟
أنا بحلم بكل جميل
جوّايا حب وتفانى
أمد ايدى بوردة وفل
أحب الفرح ياخده الكل
ما شلتش م الخنّى غِل
وأقول برضو مسيرُه يفوق
ويفهم إنها مش سوق
دى دنيا ماشيه بالقُدره
لا هى ناسيه ولا فاكره
ده فيها كل شئ مقسوم
لكن يا ربى لو أقدر
ألاقى الورد والسكر
ألاقى الراحه متأخّر
م انا ف الدنيا آخر السير
ورحلة عمرى فيها كتير
حلمت إنى أكون كالطير
لكن فى حظ متقدّر
وأنا إنسان
مش أكتر ،،،،،،
بقلم / إبراهيم فهمى المحامى
ليست هناك تعليقات:
إرسال تعليق