صحبة يا نيل
شعر : زينب سالم
مين يقصدك يا نيل غير الحبايب
ده اللي بأحبه ياما جالك دايب
شكا لك مني و قال ياما عني
و مين يا غريب يلوم عالحبايب
قصادي إتنين دايبين إيه بيقولوا
بيفكروني يا عيني باللي غايب
نفسي أقول وما يخلص كلامي
أحكي حكاية حبي لكل الحبايب
حكاية قصيرة أو طويلة بلا ختام
كانت في يوم عادي من الأيام
يوم ما قابلته كان بدون كلام
إتصادمنا و أنا ماشية جوايا أحلام
إلا و عينيه في عينيا و بدأ الهيام
من نظرة وقفنا و بدأ الأبتسام
و عينينا قالت كتير و لا حد سامعنا
ما حسينا يومها و لا حد جاوبنا
حتي صاحبه اللي كان تالتنا
عرف إن قلوبنا شبكت و فارقنا
حتي بعد أيام و شهور مراقبنا
لحد ما برد حبنا يوم و عرفنا
و جينا هنا و قلنا كل كلامنا
قلنا كلام من بعد سلام
و باعدت ما بينا الأيام
راح ما بينا كل الغرام
حتي مشاويرنا يا نيل
سابت جوانا قلب عليل
فوتناها و وراها ميت ليل
أتارينا ماشيين في دنيا
و كانت سكتنا مواويل
لكن غطاها شمس الأصيل
و ياما هتيجي حكايات
و هتفضل عليها شاهد يا نيل
ليست هناك تعليقات:
إرسال تعليق