بعد ما رهوانه
ربنا شفاها وعفاها
بعد مادخلت الغابه وهناك اهتموا بيها وعالجوها
رجعت ليه وبداءت تتنمرد عليه
وتفتكر انها احسن منى وليها كرامه عنى وبداءت تبصلى بعين ونص وانا طبعا ليها مش قادر ابوص وقالتلى ايه انت مش عاجبك كلامى ولا ايه بينى وبينكم انا سبتها تقول اللى هيه عايزه تقولوا هوا انا هاعمل عقلى بعقلها....راحت شطحه بدماغها شطحه جامده وقالتلى بقولك ايه. قولتلها قولى ياغاليه
قالتلى انا عايزه اعمل حاجه كده بس مش عارفه هاتعجبك ولا لاءه قولتلها قولى يارهوانة قلبى ..قالتلى انا شايفه ان الحمير مهضوم حقها فى الغابات اللى انا شفتها وفيه حمار وحشى عمال ياخد حقوقنا ومستقطعنا قولتلها وبعدين ياغاليه قالتلى هنحضر من كل غابه حمار ونقعد مع بعض ونتشاور ونتحد ونوحد كلمتنا ونمنع الحمار الوحشى ده من التعدى علينا ..قولتلها وانتم عندكم كام غابه قالتلى اكثر من عشرين غابه قولتلها يانهار ابيض اكتر من عشرين غابه وكل غابه فيها كااااااام حمار ..دا انتم على كده تاكلوا الحمار الوحشى ده اكل
وفعلا عملتها رهوانه وجمعتهم وبعد الاجتماع الاول طلعوا علينا بادانة الحمار الوحشى وتانى اجتماع وتالت اجتماع وعاشر اجتماع كلهم كان نتيجتهم توجيه الادانه والشجب للحمار الوحشى مع انه كل مره ياخد حق من حقوقهم وفى يوم من ذات الايام لقيتها راجعه والدموع فى عينيها
قولتلها ايه يارهوانه مالك ياغاليه زعلانه ليه ماانا سايبك تعملى اللى انتى عايزاه ..
قالتلى ياريتك ماسيبتنى ولاخليتنى اعمل اللى انا عايزاه
قولتلها ليه يارهوانه حصل ايه مش انتم لميتم بعض علشان تتحدوا عليه قعدت تمصمص فى شفايفها وتلف وتدور حوالين نفسيها لغيت مانرفزتنى قولتلها ايه يارهوانه مالك حصلك ايه مش انتم اتحدتوا عليه علشان تاكلوه....قالتلى ازاى ناكلوا وهمه بيرحولوا من ورا بعض وبيشتغلوا معاه من ورا بعض وبيساعدوه ياكلهم من ورا بعض ...قولتلها ياسنه سوده همه حتى الحمير بيعملوا كده
اما صحيح حمير
ليست هناك تعليقات:
إرسال تعليق