*********************************
" ألم " / محمود جنــــــيدى
***********************
بتنعى ياناعى بكلام وجعلى قلبى وجع كتير وبجد ..
كلامك اصله مش حروف هجاء ،
لكنه سيف وحامى الحد ..
فبلاش تبقى قاسى ،
بلاش تعيده تانى أو تقوله لأى حد ..
كلامك جامد قوى ،
هو فى الصميم صحيح أيوة ، بس جامد ..
فوجعتلى فلبى ،
ولو ان القلب مليان والله بالوجع ،
مليان وكامد ..
ومن كتر الوجع حطيت ايدى اهه ،
زى الولايا على خدى وقاعد ..
عارف ..، امبارح جاتلى هفة كده اكنب ،
وانا واخد على الهفّات..
ولقيتنى باسال ،
قال يعنى مش عارف مين غرق أو مين اللى مات ..
لقيت الكلام بينحدف من جوايا لبرّايا
بيكتب مش اجابة ، لأ اجابات ..
مش اللى ماتوا هما اللى غرقوا ،
ولا اللى غرق هو اللى مات .!.
ابو الغريق غرق هو وامه ،
والجيران ، واهلهم ، والحبايب ..
الحكومة غرقت قبلهم ،
وللاسف برضه غرق " مجلس النوايب "..
متقوليش الفقر الله يخليك ، لا ، ا
صل الكلام ده كله كلام خايب ..
الصح والجد :
اننا كلنا ياعزيزى مخطئون مخطئون مخطئون ..
الغلط من فوقنا لتحتنا ،
ويوم القيامة كلنا على الأخطاء محاسبون ..
من فضلك ..سيبنى ارتاح شوية ،
بعدها حاقولك احنا ليه مخطئون .
مش حانام ،
بس محتاج اوقف عقلى شوية واغمّض العيون ..
يمكن وانا مغمّض تتحسن الرؤيا عندى ..
واشوف الغلط والصح .!!.
يمكن اقدر اشوف أو أحدّد الايد
اللى نازلة فينا وفى الولاد دبح ..
لا نمت ، ولا ارتحت ، ولا فتّحت ،
غير بس نار والعة محاوطانى ..
وحد حاب غطا مصنوع من نسيج الحزن
رماه فوق وغطانى ..
وحط جوايا علامة استفهام كبيرة مجنّنانى ،
وعابطانى ..
امتى يرجع البشر بشر تانى ،
ونتصرف بشكل انسانى .
ليست هناك تعليقات:
إرسال تعليق