جانا رمضان ... للشاعره / ياسمين عليوه

جانا رمضان
لما تلاقي الصحبه الحلوه
متجمعه في سهره جميلة
واما تلاقي ولاد الإخوه 
بيلعبوا في بيت العيله 
واما تشوف الوان الزينه 
متعلقه قدام بيتنا
في ثواني تلمحها عنينا
وتفكرنا بأوقات لمتنا
وتقول هنا ... مكان لعبنا
هنا كانت تملي قاعدتنا
مع اصحاب زمان 
يبقي اكيد جه رمضان
واما تروح تلعب كورة
وتشوف اصحاب زمان 
وتوج اللحظه دي بصورة
تحليها كمان وكمان
يبقي اكيد جه رمضان 
واما تلاقي صنايعي واقف 
في وسط النهار
بيعمل كنافه ويا قطايف
والكل واقف محتار 
ياخد انهي فيهم 
ويحلي عل الفطار 
يبقي اكيد جه رمضان
واما تشم ريحة الطبخه
خرجه من كل بيت 
في نفس الوقت ونفس اللحظه 
كله يقول بالله سميت 
ويتحط الفطار 
يبقي اكيد جه رمضان 
واما تلاقي فانوس بينور 
مع صوت صلاة التراويح
تحلي الصورة في عينك اكتر 
وتحس بإحساس مريح
وتحس بأمان
يبقي اكيد جه رمضان
واما تلاقي شباب سهرانه
لحد الفجر ولا زهقانه
وحشاها الضحكه في وسط اللمة
كلمه جد وضحكه عمه 
وكله فرحان 
يبقي اكيد جه رمضان 
واما تلاقي الخير بزيادة 
ومفيش شكوي زي العادة
وكل بيت عمران 
يبقي اكيد جه رمضان
#ياسمين_عليوه