الشعر مشاعر....شعر عامية..الهام شرف

الشعر مشاعر
حساها جوه القلب الباكي للأفراح
لو إني هقول كلمة حق بتجمع أحلى حبايب
ولهيبي الغايب عايش جوه قلوب الناس
وبيعزف على صوت إحساس
على إني حبيب
ولا عمري هغيب عن ساحة بتسكن جوه قلوب الناس
مش عايش وحدي عشان اتغنى دون ما اترنح
على صوت الطبلة اللي بتوهب لي كلام ملموس
ولا عيون بتبص لفوق وبينزل نورها جوه قلوب
طواف وكإني بعيش على مسرح فيه كم بيت
والبيت من جوه بل من بره إزاز
وبيحدف قلبي عليه كم معنى
والناس بتصقف وتقول الله
تصقيفة كمان راح أوصل بيها لسما عالية
والدنيا دي غالية على قلبي
وبحس كمان ان انا غالية
والناس تشتاق لي وتندهلي
فبغير اسمي
تغيير الجمهور يوم ورا يوم
خلاني أزود إحساسي
خلاني أطور في كلامي
بصيت بعيوني وقلتلهم
أنا سامع كم صوت قدامي
كم صورة
وصورتكم أحلى ما في الدنيا
ومشيت وانا سايب جواهم
الحيرة كمان
لكن ما نسيتش أسيب روحي
وبعلو الصوت ندهولي
وبإسمي كمان
فتحت عيوني وبصيت حوالية
فلقيت في عنيهم حنية
وبتوه وياهم فلقيت
ألوان الطيف
وشاورت بإيدي ان انا ماشي
ومش راجع تاني
الدور كان كله تمثيل
لكن كان عايش جوايا
ان انا إنسان
بيطبطب على حضن ضعيف
وبيحلم حتى لو صاحي
وده كله مخيف